الكراب ( السقاء )
انا كراب هاز نقرة
حرة ؛ مزينة قراب
مسلح بنحاس من فاس
محزم مرزم مع لحباب
في قميص احمر ملفوف
طول عمري على ظهري
هاز معزة رأسها محذوف
من عنقها نخوي نروي
عطشان ولهان ملهوف
قالو ناس زمان حكمة
في كتوب لمثول مزمة
كلشي السلوع هتوف
ما هي عولة ما دير طولة
إلا الزرع والماء والصوف
بان الغيم ومشات الصميم
بدا الصر فات الحر والصيوف
البرد طيح الورد رزقي تهدد
الما نعمة واصبح معيوف
نظل نجاري طول نهاري
ماخدام ما ردام ما مسالي
دق ناقوسي هجرت نعاسي
نساني زماني ما حد مبالي
تلفت وراي ما حد حداي
لا صديق من غير خيالي
السلوع وخير الزروع
عندها كيالها فين كيالي
ونا مالي يا ربي العالي
حاقرني زمان الليالي
ماعرفوني عمامي ولا خوالي
لا بالجديد ولا بالبالي
نشيت ذباني وناموسي
نيست سكت ناقوسي
ماكاين فايدة تنهت تنهيدة
جمعت حلاسي ونحاسي
تحرق دمي كميت همي
همي دخان رجعت انفاسي
بوخت زولت الكرزازة
وحتى الترازة من راسي
قالو زمان اهل الحكمة والبيان
لازم نكون بحالي بحال فاسي
بفاسي نحطب حطبي
نقاسي ونحفر ساسي
الكربة خربة تابعها نكاد
جلدة كحلة ما فيها فاد
عارف كربتي بحال صرتي
ما هي بير ولا عين ولا واد
عارف الما ينزل من السما
مغمة بحكمة ومراد
ومن رأس الجبل ينزل
صافي مزلل يهلل هواد
عارف الما احسن نعمة
الا حبسو الكريم الجواد
الكربة تخوى بالزربة
ما تسقي بهايم ولا عباد
نتمنى من الله تزول النكبة
يرجع الصيف
نحرك الناقوس
نجمع فلوس
ما يبقى حيف
الكراب من لغراب
رزقو بجيبو بالسيف
ملي يوفى لعمر
رأس مالك شبر
في التراب تغبر
الكراب يرش لقبر
نطلبو الله الوهاب
يرحم ويزول السراب
وينعادم شر بنادم ولحيف
تصفى لقلوب ثوب من الذنوب
خيرنا ما يديه غيرنا يزول لهايف
الأستاذ محمد المؤذن مؤسس ورئيس جمعية كازابلانكا للتراث الشعبي الدار البيضاء في : مارس 2007
ليست هناك تعليقات:
إرسال تعليق