@ لعجب @
لعجب..
ترميني بديك النظرة
و تسوليني مالي!
كيف بغيتيني نعرف
يميني من شمالي.
كون تعرفي لي
يوقع فيا من شوفتك
وآش يجرالي..
كنتي تحني و تشفقي
من حوالي.
من شوفة وحدة كيهجر
النعاس جفون عيوني
أيام و ليالي.
انا لي كنت نطير مع الطيور
ونقول حتي واحد
ميطير بحالي..
شكون كان يقول
بنبلة طايشة مكحلة
نطيح من العوالي.
قرصة عينيك حارة
يعلم الله بعسل شفايفك
يازينة النحالي..
نتمنى ضيافةالشهد
نتمرح فيه و نبات
معنق غزالي.
ك ندير حتى نفوز بليلة
لبسها التاج و نسميها
ليلة الليالي.
ضحكات و قالت..
فيق من لحلام يا لي
مافهم سآلي..
شوفتي ما هي سايبة
ولا نا مغرورة نمشي
بزين القوالي.
يتيمة و متيمة بالحق
لي بغاني لا بد يلقى
اعمامي و اخوالي..
و دارنا فهاد الدرب
تعرفها بيضة وخضرا
دايرة دوالي.
زادت و خلاتني حاير
عقلي مشغول و افكاري
تشالي و تلالي.
و كل دقيقة تدوز بعدها
الدم يهرب من وجهي..
و تزيد علالي.
أحمد عقبة
ليست هناك تعليقات:
إرسال تعليق